District ni Profile

North Garo Hills District Garo Hillsni salgrochipak ong·a. Ia North Garo Hills District-an Garo Hills-ni a·jaona re·chakatani nakuram ong·a aro ian Assamni sima ari jol baksa nangchapgrike donga. Iano Garorang baksana gipin songdongchapenggipa jatrang jekai Rabha, Hajong, Kachari aro Bororang gnang. Ia biap sub-tropical jolo ga·akani gimin chu·onga gitan mikka bitchirangko man·a aro rona rotobegipa balwarangkoba man·aia. Iano songdongenggipa manderang Indo-Burmese-Tibetan ma·chongoni ong·baa ine agana.

Gitcham Salrangni Gimin Nipilataniko Dakna

Assam Sorkari-o ong·kuengmitingon 1952 bilsini October jani 2 gipa tariko Resubelparako skotong done, Resubelpara Development Block-ko kuliaha.

Meghalaya Sorkari Resubelparako sason ka·tona gita Administrative Unit dake 1976 bilsio songangskaaha.

Uni  ja·mano chu·gimik Civil Sub-Division -ona 30 April, 1982 bilsio ra·doatskaaha.

A·jani Sorkari Resubelparako 29 November, 1995 bilsio Town ine parakate Municipal Board-koba  28 February, 1997 bilsio ra·gataha.

Mande ra’ako mangipa Dr. Mukul Sangma, Meghalaya-ni Chief Minister ong·engmitingo Resubelpara Civil Sub-Division-ko chu·gimik District ge·sa ong·e 24 March, 2012 parakatskaaha.

Ia gitalgipa North Garo Hills District-ko Mande ra’ako mangipa Dr. Mukul Sangma, Meghalaya-ni Chief Minister ong’engmitingo an·tangan  jinmani mikkango 27 July, 2012- tariko oprake on·angskaaha.

Sima Arirang

Salgro – Goalpara (Assam)
Salgipeng – East Garo Hills District (Meghalaya)
Saliram – Kamrup (Assam) aro West Khasi Hills District (Meghalaya)
Salaram – Dadenggre Civil Sub-Division aro West Garo Hills (Meghalaya)

Apalani

Ia a.dokni apalani 1,086 Sq Km (As per the District Statistical Handbook 2014-15).

Skotonggipa Song

District-ni skotonggipa song Resubelpara ong·a.