Janggitangna dake cha∙ani obosta

Game ge·e cha·ani

North Garo Hills District –o janggi tangani cholrangara mongsongbate songadamrango game ge·e cha·aniko dakrongbata. Game ge·e cha·aniko 90% manderangan North Garo Hills –o daka aro iachin uamang mongsongbate janggiba tanga. Pilak biaprangon a·bri aro a·kawe jolrango mi ko mongsongbate ge·a. Mi-misina agre gipin ge·chapgipa bosturangara ta·bolchu, ta’a, me·rakku, gom-mi, bajra, dali iarangan ong·a. Iandake skatang a·brirangko o·trange bol aro samsirangko saroke gale biap damsaoni damgipinona jitroroe ge·a gamaniko dakani gimin bolam-bolterangko man·anirang komiroroangengahani gimin a·dokni Sorkari game ge·e cha·giparangna dingtang dakgipa rokomni ge·a gamanirangko jekai : gadang-gadang dake a·ako gamani, ga·nanggijagipa a·rongronggipa a·arango game ge·anirangko dakna skiskana gita kamko ka·skaenga.

Biterang ba bolam bolterangko gama ge.ani

Biterangko palbadinge cha·aniba ia jolo namen chu·sokgipa badingani ong·engani gimin a·dokni Sorkari iako chu·sokbatatna dingtang dingtang dake nianirangko dakenga. Mongsongbate ia district-o komilla, anaros, letchu, te·rik, te·brong aro ugita dingtang dingtang mesenggipa biterangko man·a. Mongsongipa pangnajolna game man·gipa biterangara gue, kesunat, narikkel, chabijak, golmoris, tespat, pan aro rubber. Pulrangko ge·e gameba manderang ia jolo cholina gita man·enga. Anthurium, lilium, jerbera, chrysanthemum aro fernrangna agreba burungrango charamramaigipa orchidrangkoba ia jolo bang·en man·na gita ama. Vanilla iako ia jolo da·osa skanggipa changna ge·e nianiko dakenga. Indiba ia ge·e game man·enggipa bosturangko palbadinge chu·sokaniko man·aniko champengenggipa cholrang donga. Ge·a gamaniko dakna ga’nanggijagipa a’arang aro jimbee mikka waanirang, a·arangni rurongani aro a·ani a·mitimrangni nosto ong·anganirang aro chirangko man·rakgijarangan ong·a. A·dokni sorkariba ia pilakkon niroke ge·a gamaniko dakenggipa manderangna uamangni ge·a gamani bewalrangko dingtangatna mikrakataniko aro nambata bewalrangko jakkale chu·sokaniko ra·bana u·iatanirangkoba bang·en dakengaha.

Badingchiwalani cholrang

A·dok gimikon ge·a gamani cholko dake cha·genchimoba an·tangtangni man·gimin mi-misi aro bolam-biterangko maikai bading-chiwalaniko dakgenchim iani gimin mamung namdapataniko dakna man·kujaenga. District-o Food processing unit ba maikai man·gimin bol biterangko dingtang rokomni ringani ba cha·ani bosturangko tarie palskana man·genchim, iarangko dake on·na man·genchimode bang·en namgniko manderangna aro badingchiwalaniko tang·doatnaba bang·a cholrangko man·genchim. Ge·a gamanirangna agreba chonchonbegipa karkanarangko noktangtangon dakeba janggi tangani cholrangko dakna man·gen jekai : kilding rikani aro ganna-ba·ra dokani, noko jilanirangko jilani aro matchurangko jile dudrangko palani, sol·a repani kamrang aro wa·arangoniko wata-chengani kamrang, ittarangko tariani aro ugitarang. Una agre tangkamgipa karkanarangara bolrangko sol·a repani, bija jillani, a·ani me·dikrangko tariani aro atte-gitchirangko dakani jerangan a·doko cholibatgipa pale-sim·e cha·anirang ong·achim